సీఐ సుబ్బానాయుడు సాహసానికి పెద్ద సెల్యూట్.

సీఐ సుబ్బానాయుడు సాహసానికి పెద్ద సెల్యూట్.

నేటి చర్చ : చిలకలూరిపేట , చిలకలూరిపేట నుంచి గుంటూరు వెళ్లేందుకు ఓ కారు డ్రైవర్, చార్జీలు తీసుకుని ఓ మహిళను తన కారులో ఎక్కించుకున్నాడు. వర్షం తీవ్రరూపం దాల్చడంతో తిమ్మాపురం అండర్ పాస్ బ్రిడ్జి వద్ద భారీగా వరద నీరు వచ్చి చేరింది. అక్కడ విధుల్లో ఉన్న పోలీసులు ప్రమాదాన్ని పసిగట్టి, అటుగా ఎవరూ వెళ్లవద్దని హెచ్చరిస్తూ ఆపడానికి ప్రయత్నించారు.

అయితే పోలీసుల హెచ్చరికలను పెడచెవిన పెట్టిన ఆ డ్రైవర్, కారును మొండిగా ముందుకు పోనిచ్చాడు. బ్రిడ్జి కిందకు వెళ్లగానే ఒక్కసారిగా భారీ ఎత్తున నీటి ప్రవాహం ముంచెత్తింది.

క్షణాల వ్యవధిలోనే కారు నీటమునగడం ప్రారంభించింది. పరిస్థితి విషమించడంతో డ్రైవర్ క్షణాల్లో కారు దిగి తనను తాను రక్షించుకున్నాడు.

కానీ లోపల ఉన్న మహిళ నిస్సహాయంగా ఉండిపోయింది. ప్రాణాలు కాపాడుకునేందుకు ఆమె అతికష్టం మీద కారు పైకప్పు ఎక్కి ప్రాణభయంతో కేకలు వేయడం మొదలుపెట్టింది. సరిగ్గా అదే సమయంలో అటుగా స్కూటీపై వస్తున్న మరో ఇద్దరు మహిళలు కూడా ఈ వరద ప్రవాహంలో చిక్కుకున్నారు.

వాహనం పూర్తిగా మునిగిపోతుండటం, కారుపై ఓ మహిళ ప్రాణభయంతో ఉండటం గమనించిన ఆ ఇద్దరూ ఎలాగోలా ఈదుకుంటూ వెళ్లి అదే కారు పైకెక్కి కూర్చున్నారు.

వరద మరింత పెరగడంతో కారు క్రమంగా కొట్టుకుపోవడం ప్రారంభమైంది. మూడు నిండు ప్రాణాలు క్షణక్షణానికీ మృత్యువు అంచున కొట్టుమిట్టాడుతున్నాయి.

ఈ హృదయవిదారక దృశ్యాన్ని గమనించిన సిబ్బంది తక్షణమే రూరల్ సీఐ బి. సుబ్బనాయుడుకు సమాచారం అందించారు. సమాచారం అందిన మరుక్షణమే ఏమాత్రం ఆలస్యం చేయకుండా ఆయన ఘటనా స్థలానికి చేరుకున్నారు.

పరిస్థితిని ఒక్కసారిగా సమీక్షించిన సీఐ, ఎన్డీఆర్ఎఫ్ బృందాలు లేదా అదనపు సహాయం వచ్చేంత సమయం అక్కడ లేదని గుర్తించారు.

ఏ ఒక్క క్షణం ఆలస్యమైనా కారు ప్రవాహంలో పూర్తిగా మునిగి ప్రాణనష్టం జరిగే ప్రమాదం పొంచి ఉంది.

క్షణాల్లో తీసుకున్న నిర్ణయంతో, తన ప్రాణాలను సైతం లెక్కచేయకుండా నడుముకు బలమైన తాడును కట్టుకుని ఉగ్రరూపం దాలుస్తున్న వరద నీటిలోకి దూకారు.

నీటి ప్రవాహం తీవ్రంగా ఎదురొస్తున్నా వెనకడుగు వేయకుండా ఈదుకుంటూ కారు వద్దకు చేరుకున్నారు. భయంతో వణికిపోతున్న ఆ ముగ్గురు మహిళలకు భరోసా కల్పించి, స్థానిక సిబ్బంది సాయంతో ఒక్కొక్కరినీ జాగ్రత్తగా సురక్షిత ప్రాంతానికి చేర్చారు.