హైతాబాద్లో ట్రెఫాయిల్ కంపెనీలొ అగ్నిప్రమాదం.. భారీగా ఆస్తి నష్టం

హైతాబాద్లో ట్రెఫాయిల్ కంపెనీలొ అగ్నిప్రమాదం.. భారీగా ఆస్తి నష్టం.
మూడు గంటల పాటు కొనసాగిన అగ్నిమాపక చర్యలు.. ముగ్గురికి స్వల్ప గాయాలు.
షార్ట్ సర్క్యూట్తోనే ప్రమాదం జరిగి ఉండొచ్చన్న అధికారులు.. ఫైర్ స్టేషన్ ఏర్పాటుకు స్థానికుల డిమాండ్.
నేటి చర్చ : రంగారెడ్డి జిల్లా, 22 నవంబర్, షాబాద్ మండలం హైతాబాద్ గ్రామ సమీపంలోని ట్రెఫాయిల్ ప్యాకింగ్ కంపెనీలో ఆదివారం భారీ అగ్నిప్రమాదం చోటుచేసుకుంది. ఒక్కసారిగా చెలరేగిన మంటలు క్షణాల్లో కంపెనీ అంతటా వ్యాపించడంతో తీవ్ర కలకలం రేగింది. దట్టమైన పొగ ఆకాశాన్ని కమ్మేయడంతో పరిసర ప్రాంతాల ప్రజలు భయాందోళనకు గురయ్యారు. కంపెనీలో పనిచేస్తున్న కార్మికులు ప్రాణాలు అరచేతిలో పెట్టుకుని బయటకు పరుగులు తీశారు.
సమాచారం అందుకున్న అగ్నిమాపక సిబ్బంది హుటాహుటిన ఘటనా స్థలానికి చేరుకున్నారు. మంటల తీవ్రత అధికంగా ఉండటంతో వాటిని అదుపులోకి తీసుకురావడానికి సుమారు మూడు గంటల పాటు తీవ్రంగా శ్రమించాల్సి వచ్చింది. చివరకు మంటలను పూర్తిగా అదుపులోకి తీసుకురావడంతో పెద్ద ప్రమాదం తప్పింది. ఈ ఘటనలో ముగ్గురికి స్వల్ప గాయాలైనట్లు సమాచారం. ఎలాంటి ప్రాణనష్టం సంభవించకపోవడంతో అందరూ ఊపిరి పీల్చుకున్నారు.
షార్ట్ సర్క్యూట్ కారణమా?
ప్రాథమిక విచారణలో విద్యుత్ షార్ట్ సర్క్యూట్ కారణంగా మంటలు చెలరేగి ఉండవచ్చని జిల్లా అగ్నిమాపక అధికారి కరీమ్ వెల్లడించారు. అయితే ప్రమాదానికి అసలు కారణం ఏమిటన్నది ఇంకా స్పష్టతకు రాలేదు. ఆయిల్ లీకేజీ లేదా విద్యుత్ లోపం కారణమా అనే కోణాల్లో పరిశీలన జరగాల్సి ఉంది. అధికారుల పూర్తి స్థాయి విచారణ తర్వాతే ప్రమాదానికి గల కారణాలు వెల్లడికానున్నాయి.
పరిశ్రమలు పెరుగుతున్నా.. ఫైర్ స్టేషన్ ఏదీ?
హైతాబాద్ పరిసర ప్రాంతాల్లో పరిశ్రమలు, ప్యాకింగ్ యూనిట్లు పెరుగుతున్నప్పటికీ స్థానికంగా శాశ్వత అగ్నిమాపక కేంద్రం లేకపోవడంపై ప్రజలు ఆందోళన వ్యక్తం చేస్తున్నారు. అత్యవసర సమయంలో అగ్నిమాపక వాహనాలు దూర ప్రాంతాల నుంచి రావాల్సి వస్తే ప్రమాద తీవ్రత మరింత పెరిగే అవకాశం ఉందని పేర్కొంటున్నారు. భవిష్యత్తులో ఇలాంటి ఘటనలు పునరావృతం కాకుండా హైతాబాద్లో వెంటనే ఫైర్ స్టేషన్ ఏర్పాటు చేయాలని ప్రభుత్వాన్ని డిమాండ్ చేస్తున్నారు.
పరిశ్రమల్లో అగ్నిమాపక భద్రతా ప్రమాణాలను కఠినంగా అమలు చేయాలని, విద్యుత్ వ్యవస్థలు, అగ్నిమాపక పరికరాలను ఎప్పటికప్పుడు తనిఖీ చేయాలని స్థానికులు కోరుతున్నారు. కార్మికుల భద్రతకు ప్రాధాన్యతనిస్తూ అధికారులు తక్షణ చర్యలు చేపట్టాలని విజ్ఞప్తి చేస్తున్నారు.
